Anxo Moure: natureza e tradición

 

Premer na imaxe para acceder á galería de fotos

O alumnado de educación infantil e 1º ciclo de primaria gozou cos contos e cantos de Anxo Moure. Contando, cantando e tocando animou a pequen@s e maiores, transmitindo o respecto, coidado e preservación do medio. Historias solidarias coa terra e as persoas que a habitan, defendendo o conto como ferramenta educativa, tal e como se recolle no proxecto de Anxo Moure: contos solidarios.

O seguinte vídeo é un resumo da divertida e educativa sesión con Anxo Moure.

Agradecid@s ao Consorcio Editorial Galego por facilitarnos a sesión e a Anxo Moure pola súa gran sensibilidade e amabilidade.

Encontro e contos con Boniface Ofogo

 

Premer na imaxe para acceder á galería de fotos

Pechamos, con Boniface Ofogo, un Mes das Letras do máis cultural e diverso.

Boniface mantivo un encontro co alumnado de 4º de primaria, que tiña moitas preguntas sobre os seus libros e biografía. O escritor e griot (figura tradicional de África encargado de narrar historias) respondeu transmitindo moitos valores e ensinanzas, como a paciencia, non a lentitude que se asocia á tartaruga.

Despois do encontro, gozamos no Centro Cívico e Cultural de Malpica, da súa mestría como contacontos. Contos de animais e ata cantos, que tanto gustaron.

Todo un éxito de encontro e contos da man de Boniface Ofogo. Agradecid@s polo seu bo facer.

Encontro con Antón Cortizas

O escritor Antón Cortizas, mestre xubilado, mantivo un encontro coas aulas de 2ºA e 2ºB/3º de primaria para falar sobre o seu libro, "Os versos da mariola", incluído no Plan Lector das aulas.

Unha xornada entre libros, brinquedos de papel e xogos de palabras que tan ben argalla Antón. Ao tempo, asinou os exemplares do alumnado, da biblioteca e entregounos un fermoso agasallo en forma de libro, "Tenrura", tamén asinado polo autor.

Premer na imaxe para acceder á galería de fotos

Agradecid@s a Antón pola súa amabilidade, bo facer e o agasallo en forma de libro para a nosa biblio (na imaxe o exemplar "Tenrura" da súa autoría, un fermoso agasallo asinado); así como a Edicións Embora que nos facilitou o encontro.

Todo un éxito de xornada na nosa lingua, entre libros e brinquedos!

AS NOSAS LETRAS!: poesía popular oral

 

Premer na imaxe para acceder á galería de fotos

Ao longo do curso, a exposición AS NOSAS LETRAS! seguiu adicada a escritoras/es galegas/os e homenaxeadas/os nas Letras Galegas: Concha Blanco, Rosalía de Castro e as cantareiras e pandeireteiras.

Exposición que foi mudando cada trimestre, renovando exemplares e facilitando novos códigos QR para acceder a recursos en liña.

Nas imaxes podemos ver a última exposición do curso, no noso Mes das Letras, e a cartelería en homenaxe á poesía popular oral. Homenaxe que a Real Academia Galega celebrará no Centro Cívico e Cultural de Malpica de Bergantiños o vindeiro sábado 17 de maio, por ser o concello natal das Pandereteiras de Mens; tal e como se recolle na programación do Concello de Malpica que podedes ver na seguinte imaxe.

Agradecemos ao Concello de Malpica de Bergantiños a doazón que, como cada curso escolar, realiza polo Día das Letras Galegas. Na imaxe podedes ver os exemplares doados, que pasarán a formar parte do catálogo da nosa biblioteca:

A lingua galega soa e resoa na nosa escola, divulgando, dinamizando, valorando o noso rico patrimonio inmaterial: coidado, preservación e transmisión da lingua todos os días do ano.

Maleta Naturalista do CEIDA

 

Premer na imaxe para acceder á galería de fotos

Hoxe, Día Mundial do Libro 2025, chegou a nosa biblio a Maleta Naturalista que solicitamos ao Centro de Extensión Universitaria e Divulgación Ambiental de Galicia (CEIDA).

Unha maleta con 23 exemplares do máis naturais: cadernos de campo, guías de flora, fauna e fungos, inventarios...; exemplares para informarse e formarse a disposición de toda a comunidade.

Unha maleta viaxeira para divulgar o patrimonio natural de Galicia, para empregar como fontes de información e achegarse á natureza, un gran recurso didáctico para o 3º trimestre e como peche do PDI "Medicus curat natura sanat" que iniciamos o pasado curso.

Agradecid@s ao CEIDA por facilitarnos recursos bibliográficos que amplian o catálogo da nosa biblio e enriquecen a proposta de actividades en relación co PDI que nos ocupa.

Encontro con Berta Dávila

Premer na imaxe para acceder á galería de fotos

O alumnado de 1º e 6º de primaria mantiveron un encontro con Berta Dávila autora de O libro grande dos números pequenos e O Concurso dos Mellores Inventos (e outros incribles acontecementos)

Entre poesía e narrativa a escritora foi respondendo a todas as preguntas, que non foron poucas, arredor dos dous exemplares que forman parte dos títulos incluídos no Plan Lector 2024-25 do centro.

Ao tempo, asinou todos os exemplares de cada nen@ para que tanto os que iniciaron etapa de primaria como os que a rematan conten na súa biblioteca persoal cun libro de calidade en lingua galega e... asinado pola autora!

Agradecer a Xerais que nos facilitara o encontro e a Berta a súa dispoñibilidade e amabilidade para compartir o seu tempo c@s nen@s e profes do Milladoiro.

Encontro con Sabela Fernández

Premer na imaxe para acceder á galería de fotos

No día de hoxe, o alumnado de 5º de primaria asistiu ao Encontro con Sabela Fernández Trelles, autora de A miña avoa, a miña heroína.

O exemplar, que forma parte dos títulos do Plan Lector 2024-25, reflicte os medos de Laura e a tan necesaria rede de apoio na que a súa avoa é a súa heroína. Un relato altamente emotivo no que algunha das alumnas lectoras se viron reflectidas.

Sabela dinamizou o encontro con diversos materiais cos que foi dando tratamento aos puntos clave da súa aventura literaria, fantástica ou real foi unha das preguntas, a que a autora respondeu que algo de realidade persoal tamén había na historia.

Agradecemos a editorial Xerais a posibilidade de contar con Sabela Fernández, e a escritora por regalarnos un relato tan noso: as nosas raíces, as relacións familiares, o benestar emocional...

O encontro pechouse coa entrega dun pequeno agasallo para que recorde este primeiro encontro na biblioteca do noso cole, así como coa sinatura de libros da que recollemos a seguinte frase de Sabela:

Vive e soña sen medo!

Grazas Sabela, esperamos novas aventuras literarias para volver... encontrarnos, emocionarnos!

Proposta de actividades 2024-25

 

Premer na imaxe para acceder ao documento

Presentamos a proposta de actividades para o curso que nos ocupa. Unha proposta que recolle actividades anuais e trimestrais, entre as cales destacamos as propostas de cada ciclo en relación con conmemoracións varias.

Actividades como os nosos Laboratorios de Aprendizaxe, nos que o uso de espazos e recursos creativos da Biblioteca Escolar-LeoLab son un privilexio ao que non podemos renunciar: metodoloxías activas nas que o alumnado é protagonista das súas aprendizaxes.

Ao tempo, a proposta acolle actividades sistematizadas e que nos son propias: dinamizando a lingua, animando á lectura, á escritura, a creación de producións propias e facilitando/favorecendo o coñecemento e uso dos fondos da nosa biblio (novidades, teatro, banda deseñada, ensino...), entre outras.

Avante toda e... a seguir lendo, informándonos e aprendendo!

Manuela Contacontos: "O Grúfalo e a natureza"

 

Premer na imaxe para acceder á galería de fotos

O pasado venres clausuramos a biblio para o curso 2023-24, mais... a lectura continúa!

No día de hoxe, o alumnado de infantil e 1º ciclo de primaria visitaron o parque Luciano García Alén, ubicado en Buño, para gozar con Manuela Contacontos de: "O Grúfalo e a natureza".

Ademais de lectura compartida, tamén reflexionaron sobre o coidado da natureza e o respecto ao medio.

Agradecer a Manuela o seu bo facer, encantad@s de escoitala.

O vindeiro curso... máis lectura na rúa!

Encontro con Jorge Campos

Premer na imaxe para acceder ao álbum de fotos

O pasado venres 10 de maio o alumnado do 2º ciclo de primaria mantivo un encontro con Jorge Campos.

Jorge Campos, ilustrador e autor, iniciou o encontro con contidos básicos de banda deseñada: historia, partes dun cómic... Posteriormente, respondeu a todas as preguntas en relación co seu exemplar: "Capitán Lentella", título do Plan Lector Anual da aula de 4º de primaria; así como asinou os exemplares de tod@s, con ilustración incluída, e tamén nos deixou asinada a lámina das ilustracións que realizou.

O alumnado puido ver o proceso de ilustración, en vivo, dos diversos personaxes de "Capitán Lentella" e recibiu a boa nova, de boca do autor, da próxima publicación de "Capitán Lentella 2"; o que levou a que o alumnado de 4º de primaria pida para o vindeiro curso que se inclúa nos títulos do Plan Lector este exemplar en 5º de primaria (petición recibida e... aprobada!)

Só nos queda dicir que foi un auténtico pracer contar con Jorge Campos, pola súa dispoñibilidade, bo facer e amabilidade en todo momento. Ao tempo, dicir que Jorge quedou encantado coa produción propia que elaborou o alumnado de 4º de primaria, coa súa titora Belén como orientadora e guía do proceso, ao redor do título.

Engadir que Jorge foi o encargado de realizar o póster do presente curso, "Unha biblioteca escolar en viñetas", da Asesoría BEGA e que temos publicado na columna do presente blog.

O vindeiro curso... máis encontros!

Encontro con Eva Mejuto: "O día que choveron gatos"

Damos continuidade ao noso Mes das Letras 2024 co encontro entre o alumnado de 6º de primaria e a autora Eva Mejuto, facilitado pola editorial Xerais.

O título do Plan Lector Anual da aula de 6º de primaria, "O día que choveron gatos", motivou o encontro para coñecer, en persoa, a escritora do libro. Ao tempo, Eva respondeu a todas as preguntas en relación co libro e con moitos outros títulos escritos pola autora, así como a súa traxectoria vital e literaria.

Premer na imaxe para acceder á galería de fotos

Agradecemos a Eva a súa dispoñibilidade e amabilidade, o alumnado quedou encantado de coñecela e presentarlle as súas creacións artísticas ao redor do libro.

O alumnado de 6º espera unha segunda parte do libro, mais Eva puido levar un borrador da mesma escrito por Alejandro García para a exposición de aula.

Estaremos atent@s a próximas publicacións da autora.

Punto Laranxa e "Pasando a Bóla"

Premer na imaxe para acceder á galería de fotos

Chegou a todos os colexios públicos de Galicia o Punto Laranxa contro o acoso e o ciberacoso escolar. Un punto físico para deixar no seu buzón mensaxes escritas ao redor de situacións de acoso propias ou que se perciban en terceiros. Un punto tamén virtual, a disposición na web do noso colexio.

O alumnado de 6º de primaria foi o encargado de inFORMAR ao resto de alumnado, mesmo creando un cartel moi ilustrativo para o Punto Laranxa do noso cole.

Ao tempo, grazas ao Consorcio Editorial, iniciamos o noso Mes das Letras 2024 coa actividade cultural de A Xanela do Maxín: Pasando a Bóla para o alumnado de 2º e 3º ciclo de primaria e inspirada no título de Celtia Figueiras "A Banda dos Insectos. Pasando a Bóla" que David nos entregou en doazón.

Premer na imaxe para acceder á galería de fotos

Unha representación teatral, dirixida por David, na que o alumnado desenvolveu un papel activo, protagonizando diversas escenas de acoso nas que o público participa aportando posibles solucións ás situacións representadas.

No seguinte vídeo podedes visualizar como a Roncolla realiza unha das súas reflexións finais de cada escena ao redor do termo "chivato" e como @s nen@s voluntari@s len, a modo de peche da actuación, os diversos dereitos aportados por David, que tamén alude aos deberes de tod@s.

Dereitos e deberes para desenvolver unha convivencia respectuosa e pacífica na que TOD@S contamos moito e temos moito que contar, pola nosa saúde e benestar persoal e social.

Exposición PDI_3º trimestre

Premer na imaxe para acceder á galería de fotos

Presentamos a última exposición do curso escolar ao redor do PDI que nos ocupa, como recursos bibliográficos para as actividades a desenvolver da proposta trimestral.

 Unha exposición para seguir dinamizando lecturas diversas, para tod@s: mes das letras, medio ambiente, natureza, habilidades olvidadas...

O vindeiro curso... máis lecturas!

Semana da Muller 2024: entrevistas fantásticas

SEMANA DA MULLER 2024 de bibliotecamilladoiro

Presentamos os produtos finais de cada grupo-clase en relación coa Semana da Muller 2024 e o PDI que nos ocupa. Premendo na imaxe-presentación de cada aula accederedes á publicación que realizaron no blog de ciclo.

Ao longo da semana, todos os grupos presentan na biblio a súa entrevista fantástica, gravada en Radio Balea e co apoio documental dos exemplares a disposición na exposición temporal Leo le... 8M!, para conmemorar o Día da Muller 2024.

Ao tempo, achegamos o enlace ao álbum de fotos das presentacións realizadas na biblio para o resto de compañeir@s e profesorado, álbum que se irá incrementando ao longo da semana. Premer na seguinte imaxe:

Unha vez máis, felicitar a tod@s polo fantástico traballo de investigación, comunicación e presentación final ao redor de Mulleres pioneiras en moitos campos,

MULLERES QUE ABRIRON CAMIÑOS!

Exposición PDI_2º trimestre

Premer na imaxe para acceder á galería de fotos

Achegamos, en imaxes, a exposición do 2º trimestre que acolle exemplares diversos para realizar lecturas compartidas en relación coa proposta de actividades trimestral.

Diversidade lectora para chegar ao coñecemento, para explorar temáticas varias: emocións, valores, identidade, igualdade, diversidade...

Un trimestre lector para tod@s!

Exposición PDI_1º trimestre

Premer na imaxe para acceder á galería de fotos

Presentamos a exposición do 1º trimestre en relación co PDI que nos ocupa.

Exemplares varios para desenvolver tarefas integradas/proxectos diversos e dar tratamento a temáticas diferentes: ciencia, filosofía, natureza, narrativa, poesía...

Iniciando curso, mergullándonos en novas lecturas para descubrir, para preguntarnos, para gozar da lectura como fonte de placer e información.