Bitácora do Proxecto Documental Integrado bianual, 2023-24 e 2024-25, do CEIP Milladoiro de Malpica de Bergantiños. Un PDI para seguir preguntándonos, investigando, un proxecto... moi saudable!
Chegamos a porto, unha nova singradura chega ao seu fin. Presentamos un resumo audiovisual do PDI que nos ocupou os dous últimos cursos escolares: experiencias de vida do máis naturais.
Agradecid@s a toda a comunidade, pola súa implicación en cada actividade, polas responsabilidades individuais e colectivas, dentro e fóra do horario lectivo, para que a nosa escola bibliotecaria continúe a senda da educación de calidade, pública e rural, por e para tod@s.
No día de hoxe celebramos a xornada de convivencia intercentros organizada polo Concello de Malpica.
Había moitas ganas de pasalo ben entre amig@s: saltando, bailando... xunt@s!
Agradecemos ao Concello, un ano máis, a invitación a unha lúdica xornada que se desenvolveu no CEIP Joaquín Rodríguez Otero de Buño.
Un curso máis, desenvolvemos a Xornada sobre rodas. Unha actividade que gusta a peques e maiores, vivenciando a educación vial: respectando os sinais verticais, o sentido da circulación e á autoridade, representada polo alumnado de 6º de primaria que facilitou a circulación e ata aplicou algunha sanción por velocidade.
Feliz verán... sobre rodas!
.jpg)
Paco Nogueiras co seu novo traballo, Son Animal, pechou o PDI que nos ocupou estes dous últimos cursos.
Un concerto protagonizado por moitos animais, que animaron a peques e maiores nunha xornada para bailar e cantar.
Ao tempo, Paco asinou o exemplar da nosa biblio e o caderno de visitas que recolle os encontros culturais da nosa comunidade.
.jpg)
.jpg)
Contar con Paco Nogueiras sempre é un éxito, agradecid@s de compartir unha xornada do máis divertida con Paco e os seus animais.
Aproveitando que no centro dispoñíamos de ducias e ducias de libros de expurgo, para a conmemoración do Día do Medio Ambiente decidimos darlles unha segunda vida.
Cada aula acercouse á zona de libros de expurgo do primeiro andar e levou varios para a aula. Despois, iniciaron o seu propio proceso creativo, guiados polas titoras/es.
Recortaron, pegaron, pintaron, superpoñeron materiais, engadiron ou eliminaron texto... E mesmo crearon as súas propias historias de cero, recortando palabras de diferentes libros para xuntalas noutro novo!
Clica na imaxe para acceder á galería.
.jpg)
Celebrando o Día do Medio Ambiente presentamos o xogo de produción propia creado no 1º trimestre dentro da tarefa integrada "O noso universo".
Un xogo con casas especiais e casas-reto para desenvolver diversas aprendizaxes: Reducindo, Reciclando e Reutilizando.
Esperamos... vos divirta!
A última saída do curso foi do máis natural, visitando o Labirinto de Breogán (Vilarmaior) e o Parque Atenea (Arteixo)
Tod@s conseguimos chegar á torre central do labirinto, onde puidemos gozar das súas vistas e dos xogos tradicionais. Rematamos a xornada no parque, entre xantar e xogos compartidos.
.jpg)
Despedimos o curso na natureza, actividades de lecer ao aire libre entre compañeir@s.
O alumnado de educación infantil e 1º ciclo de primaria gozou cos contos e cantos de Anxo Moure. Contando, cantando e tocando animou a pequen@s e maiores, transmitindo o respecto, coidado e preservación do medio. Historias solidarias coa terra e as persoas que a habitan, defendendo o conto como ferramenta educativa, tal e como se recolle no proxecto de Anxo Moure: contos solidarios.
O seguinte vídeo é un resumo da divertida e educativa sesión con Anxo Moure.
Agradecid@s ao Consorcio Editorial Galego por facilitarnos a sesión e a Anxo Moure pola súa gran sensibilidade e amabilidade.
Presentamos, en formato dixital, a terceira edición do noso Galicómic: produción propia de banda deseñada, en lingua galega, e facendo uso da fotografía ou a técnica croma key.
Nenas/os protagonistas das súas producións, en relación co PDI: natureza, saídas, respecto e coidado do medio, benestar persoal e social...
Produción propia que está en proceso de maquetación para ser catalogada na nosa biblio, valorando e custodiando as producións de todas e todos.
Un curso máis, parabéns a tod@s!
Pechamos, con Boniface Ofogo, un Mes das Letras do máis cultural e diverso.
Boniface mantivo un encontro co alumnado de 4º de primaria, que tiña moitas preguntas sobre os seus libros e biografía. O escritor e griot (figura tradicional de África encargado de narrar historias) respondeu transmitindo moitos valores e ensinanzas, como a paciencia, non a lentitude que se asocia á tartaruga.
Despois do encontro, gozamos no Centro Cívico e Cultural de Malpica, da súa mestría como contacontos. Contos de animais e ata cantos, que tanto gustaron.
Todo un éxito de encontro e contos da man de Boniface Ofogo. Agradecid@s polo seu bo facer.
O escritor Antón Cortizas, mestre xubilado, mantivo un encontro coas aulas de 2ºA e 2ºB/3º de primaria para falar sobre o seu libro, "Os versos da mariola", incluído no Plan Lector das aulas.
Unha xornada entre libros, brinquedos de papel e xogos de palabras que tan ben argalla Antón. Ao tempo, asinou os exemplares do alumnado, da biblioteca e entregounos un fermoso agasallo en forma de libro, "Tenrura", tamén asinado polo autor.
.jpg)
Agradecid@s a Antón pola súa amabilidade, bo facer e o agasallo en forma de libro para a nosa biblio (na imaxe o exemplar "Tenrura" da súa autoría, un fermoso agasallo asinado); así como a Edicións Embora que nos facilitou o encontro.
.jpg)
.jpg)
Todo un éxito de xornada na nosa lingua, entre libros e brinquedos!
Pechamos o noso Mes das Letras celebrando o Festival que xa nos é propio. Festival no que todas as aulas celebraron a lingua galega, a tradición oral, o noso rico patrimonio inmaterial e do que podedes ver e saber máis accedendo aos blogs de cada ciclo.
Un Festival no que soou e resoou a pandeireta, a gaita, as cantigas, o himno galego... en colaboración con familias e membros da comunidade, aos que agradecemos a súa participación; ao igual que ao Diario de Bergantiños por facerse eco da nosa celebración, como podedes ver e ler premendo na seguinte imaxe da portada do xornal.
Hoxe, 17 de maio de 2025, a Real Academia Galega celebra o seu pleno extraordinario no mesmo Centro Cívico e Cultural de Malpica onde a nosa escola rendeu homenaxe a todas as cantareiras e pandeireteiras, a nosa rica tradición oral e cultural para seguir valorando e preservando o noso.
Feliz Día das Letras Galegas, hoxe e todos os días do ano!
Conmemoramos o Día da Familia 2025 coas saídas, en familia, do alumnado e familias de educación infantil, 1º, 2ºA, 2ºB-3º de primaria. Imaxes que forman parte do mural de centro, pechando o PDI que nos ocupou estes dous últimos cursos.
As imaxes falan por si soas, felices compartindo momentos en familia e se son na natureza... moito mellor!
Grazas familias, por compartir os vosos momentos con tod@s nós, e feliz día a todas!
.jpg)
.jpg)
Exposición que foi mudando cada trimestre, renovando exemplares e facilitando novos códigos QR para acceder a recursos en liña.
Nas imaxes podemos ver a última exposición do curso, no noso Mes das Letras, e a cartelería en homenaxe á poesía popular oral. Homenaxe que a Real Academia Galega celebrará no Centro Cívico e Cultural de Malpica de Bergantiños o vindeiro sábado 17 de maio, por ser o concello natal das Pandereteiras de Mens; tal e como se recolle na programación do Concello de Malpica que podedes ver na seguinte imaxe.
Agradecemos ao Concello de Malpica de Bergantiños a doazón que, como cada curso escolar, realiza polo Día das Letras Galegas. Na imaxe podedes ver os exemplares doados, que pasarán a formar parte do catálogo da nosa biblioteca:
A lingua galega soa e resoa na nosa escola, divulgando, dinamizando, valorando o noso rico patrimonio inmaterial: coidado, preservación e transmisión da lingua todos os días do ano.
Presentamos, un curso máis, as pezas audiovisuais de cada grupo-aula no noso Mes das Letras.
Dinamizando a lingua e atendendo á alfabetización audiovisual, seguimos a dar tratamento ás interferencias lingüísticas e enriquecendo o vocabulario na lingua nai.
Fala galego, DichoLeo!
Conmemoramos o Día do Libro 2025 desenvolvendo a lectura na rúa con pícnic saudable, recollida na proposta de actividades enmarcada no PDI que nos ocupa e iniciando o Mes das Letras que nos é propio.
Todas as aulas exercendo o seu dereito a ler en calquera sitio (Daniel Pennac) e a merendar do máis saudable. Desde o cabo de San Adrián ata a Atalaia de Malpica, nen@s e profesorado realizaron a Hora de Ler ao aire libre; así como a hora da merenda, un pícnic creado por elas/es.
Divulgación, dinamización do acto lector para celebrar a lectura como motor do benestar persoal e social, todos os días do ano.
Feliz Día do Libro!
.jpg)
Hoxe, Día Mundial do Libro 2025, chegou a nosa biblio a Maleta Naturalista que solicitamos ao Centro de Extensión Universitaria e Divulgación Ambiental de Galicia (CEIDA).
Unha maleta con 23 exemplares do máis naturais: cadernos de campo, guías de flora, fauna e fungos, inventarios...; exemplares para informarse e formarse a disposición de toda a comunidade.
Unha maleta viaxeira para divulgar o patrimonio natural de Galicia, para empregar como fontes de información e achegarse á natureza, un gran recurso didáctico para o 3º trimestre e como peche do PDI "Medicus curat natura sanat" que iniciamos o pasado curso.
Agradecid@s ao CEIDA por facilitarnos recursos bibliográficos que amplian o catálogo da nosa biblio e enriquecen a proposta de actividades en relación co PDI que nos ocupa.
.jpg)
.jpg)
Pechamos o 2º trimestre coa visita do Aquarium Finisterrae ao noso cole. Tod@s visitamos a furgoneta do Aquarium na que Carlos e Jose nos ensinaron unha mostra da diversidade de vida mariña que tan ben coidan nas instalacións de A Coruña.
Todas as aulas marabilladas vendo, e mesmo tocando, melgachos, rodaballos, estrelas de mar, cangrexos, centolas, ourizos e ata un coral.
Un privilexio de visita que a tod@s gustou e, seguro, non olvidaremos. Agradecid@s ao Aquarium Finisterrae e na súa representación a Carlos e Jose, pola súa amabilidade e bo facer.
Un petisco do Aquarium que animamos ir visitar estes días de descanso, un plan do máis natural e divertido!
Estes días recibimos a visita do equipo IncrescenTO, en colaboración coa Universidad da Coruña, para presentar a todo o alumnado do centro o traballo da terapia asistida con cans. Axudan a mellorar a calidade de vida de quen o precisan a través das actividades realizadas con estes animais e nestas sesións fixeron unha demostración sendo o alumnado parte activa e traballando o benestar emocional como eixe principal en todas as intervencións. Podedes ver todas as fotos premendo encima da imaxe:
.jpg)
O pasado curso inauguramos o Punto Laranxa do cole coa peza teatral de A Xanela do Maxín, "Pasando a bóla. Xogando para cambiar" para o alumnado de 2º e 3º ciclo de primaria.
No día de hoxe, volvemos contar con eles para representar a mesma peza ao alumnado de 1º, 2º e 3º de primaria dentro do programa da Consellería que solicitamos este curso.
A representación teatral foi dirixida por Celtia Figueiras, autora do libro que inspirou a peza "A Banda dos Insectos. Pasando a bóla".
A participación activa do alumnado, protagonizando diversas escenas e aportando solucións a todas as situacións que se viven no escenario, favorece o coñecemento e reflexión arredor do acoso escolar.
Todo un éxito de función, na procura da mellora do benestar persoal e social.
